Còl, pico paisc ntel cuor de le Dolomiti, nànter i monc Pelmo, Ciuita, Poure, Averau e Nuvolau, con tradizion vegle veglone e co dei valour che i é restei dagnëra compagn nànter la jent nfin al di da ncuoi.
L turism e l agricoltura i é le plu mportánti ativité e richëze economiche del paisc, prategade ntel respet de na natura che ntel teritor de Còl l'é restada ncora coche l'eva nviade.
La pèsc, n panoram che l é n splendor, stòria e tradizion, l é le carateristeghe de Còl che fèsc deventé l paisc n luoch da vijité da duc chi che vòl ben a le mont.

Col l é propio bél

de Luigia Lezuo,  dal liber "T es bel Kol dagnora"

Col l é propio l pi bel posto
che dintor chilò se ciate:
on ste crode cuasi fate
per defende nost paìs.

Den gran Col é su la zima
bel content che l l'abe arjonta
e le cese le se imponta
con i grif e coi rampogn.

Fora in zima l'é la gesia
sot na cupola turchina
e intor via l'é la curtina
ulà che paussa i puore morc.

Chi da Col i fà e i laora
per tirà sto puore vive:
lori i ara e sia ste rive
per sansoni e n goz de lat.

Ma intor via l'é dut che cénta,
biei guziei e tanc de fuori
e d'istà vian incia i siori
a se gode dut sto bel.

E i se lassa propio i voge
sun ste crode bele rosse
e soméa che degugn posse
i mostrà valch de pi bel.

Duc po bat le magn e i centa
e po i scraia e i se la gode
e i sà propio cuasi sode
che incia noi no fon compagn.

Noi sion stai usai inveze
a vardà nte soz e tase
e tason se valch ne piase:
se l godon demà ntel cuor.

Ma vignì mo jent ne ota!
Vignì a Col se volé vede
e disé a chi che no créde
che nost Col é n bel paìs.