El saé de ra śente de Anpezo, de Col e da Fodom ‘l é senpre stà leà a ra tradizios, a ra uśanzes e al vive intrà ra crodes. ’L ese tacade al propio paes e ‘ l aé dei valore i é vegniude dal vecio in fora.

Chesta śente r’é senpre stada tegniuda aduna da na vita fata de fadia e laoro par i cianpe, da un condar peśoco leà a ra stajos, da momente de festa, da funzios e da devozion.

Coscita ‘l é nasciù festes e uśanzes leades ai laore par duta ra stajios: el mes de śugno par śi a monteà, setenbre par desmonteà. Santa Maria Maiou, ra Madona de Voto e San Joani ‘s é festes leades al śi a fei fen, al śi a monteà, al laoro co ra besties e par i cianpe.

 ‘L é uśanzes leades a ra vita de dute i dis, par eśenpio a ra nozes: ra gratonada (festa che se tien a ra vea de ra nozes), ra parada (sarà su ra strada a ra spośa coscita che ra no pode sin śi inze un outro paes); festes leades al lunario, par eśenpio S. Nicolò (el santo che ra note del 5 de dizenbre aduna a calche dioul par i pi catie e a calche anjoleto par i pi boi, el porta calche don ai pi pize); par pó ruà al Nadà, a ra Pifania, a ra Pasca e a ra Pentecoste e par fenì con ra festes del santo del paes: el 13 de dizenbre a Col par Santa Luzia, el 25 de luio a Fodom par San Iaco, el 29 de śugno par i sante Pietro e Paolo e el 3 de maśo in Anpezo par i Sante Felipo e Iaco.

El tenpo ‘l à fato sci che ra vita leada ai cianpe e al laoro dei artejane ra mudase e ra sin śise senpre pi vesc n’economia fata de turismo: chesto però no ‘l à fato sci che ra śente ladina ra perdese dute chi valore che ancora i ra tien leada al so paesc.

In dut’i caje par ra śente, el so saé, ra soa uśanzes e ra tradizios eś seguita a se mantegnì e a ese senpre sentudes.