Fodom ‘l é propio un bel paes intrà ra crodes, con tropa viles sarades d’intorno da bosche e prade e con ‘na vista intrà ra pi beles de ra Dolomites: viśavì ‘l é el Zieta, in parte ‘l é ra Marmolada e śo in son el gran Boè.
D’inverno el paes de Araba el deenta un paes tropo batù da ra śente che à piazer a śi con i schie, gouja ra bela pistes e el śiro de i quatro śuoghe (Selaronda). In Araba se ciata anche ‘l ARPAV, un zentro che studia ra meteorolojia, el gnee e ra laines. Chel che resta del Castel de Andraz e ‘l Col de Lana, triste teatro de ra prima guera, i é ra testimonianzes e i recorde del pasà de chesta val che r’é propio algo de bel.

Bel Fodom!

de Sergio Masarei, tirà fora dal libro “Rime Sauride - rime fodome de scola, de fantajia, de ciantia, de mudamenc, de bloc scentimenc”

 

I disc che t'es pico,
t'es ërt 
e t'es puoro,
ma plu che te ciale,
te studie
e te abade,
me dighe che très
ti t'es el plu bel.

I disc che n planura
l é vita,
l é jent,
ma mi co ié rue
e i'ossièrve
l tinton
me pense
che meio
i é le tue mont.

Sebenche autrò
l é sciti comoc,
mi che te veighe
con animo frisc
me preie
de vive
con ti n paradisc.