Fodom l é n Comun loghé nánter le mont dolomitane, l é caraterisé da tánte picole vijinánze ntamez la natura e ié fèsc da cornisc un dei panorami plu biei de le Dolomiti: de davánt l Ciuita, dinongia la Marmolada e davò su l maestous Boè. D'invièrn l paisc de Rèba l deventa un dei plu mportánti zentri per jì coi schi ence percieche l fèsc pèrt del giro dei cater pasc (Sellaronda), e pò l é la senta del "ARPAV, Centro Valanghe" n zentro che oramèi l é deventé un dei plu famoji per la sua bravura ntel studio de la nei e de la meteorologia. Le roine del ciastel d'Andrac e l Còl de Lana, mont ulache l é sté tánt combatù nte la pruma Vièra mondial, l é doi de le testimoniánze stòriche da podèi amiré e che demostra ci che à passé sta bela val e la sua jent..

Bel Fodom!

de Sergio Masarei,  dal liber “Rime Sauride - rime fodome de scola, de fantajia, de ciantia, de mudamenc, de bloc scentimenc”

I disc che t'es pico,
t'es ërt 
e t'es puoro,
ma plu che te ciale,
te studie
e te abade,
me dighe che très
ti t'es el plu bel.

I disc che n planura
l é vita,
l é jent,
ma mi co ié rue
e i'ossièrve
l tinton
me pense
che meio
i é le tue mont.

Sebenche autrò
l é sciti comoc,
mi che te veighe
con animo frisc
me preie
de vive
con ti n paradisc.