‘L ese ladin ‘l ea e ‘l é ‘na cuestion senpre daerta e da in parlà sora.
Se śon drio a chel che ‘l é ra parlada, no se pó pensà de bete termin salde par ra śones agnó che se parla ladin. El ladin el nasce in chera che ‘l latin ‘l à scomenzà a se mescedà co ra parlades del posto. Chesto ‘l é suzedù con el 15 ignante Cristo, canche i Romane i é śude adora a ruà in Rezia. El latin el s’à donca scomenzà a mescedà con ra parlades di chiste luoghe e, gouja el fato che par ste vales se parlaa ‘na fré outramente, ‘l é suzedù che vegnise fora parlades de pi sortes, che dapó res à mantegnù soralduto in chera śones pi fora man e che ra no n’ea stades masa “roinades” da outre saé.
Tre ‘l é ra śones agnó che se parla par ladin: ra śona furlana, ra śona romancia e ra śona de ra Dolomites, agnò che se tira fora soralduto el ladin del Sela.
‘L Istitut Cultural Ladin “Cesa de Jan” el laora donca par defende, salvà e portà inaante el ladin parlà in Anpezo, a Col e Fodom.
El fodom e el da Col i se somea, invenze ‘l anpezan ‘l è ‘na parlada con de ra robes propio soes.
‘L é anche da dì che chesta tre parlades res à sentù de pi r’ influenza de ra śona venetes śo par pede.