La valorisazion de la toponomastica, che volëssa dì recuperé e pò douré i inom ladins dei luosc, l'é una de le ativité plu nteresciánti del Istitut, percieche la fèsc scì che l descore l no vade perdù. L recuperé i tièrmegn dei luosc n ladin l permët de arvejené la jent al suo raion, coscita da daidé a mantegnì chël che l eva la cultura da nviade e tignì n vita chële che l'é le tradizion ladine. L'ativité de toponomastica la ven fata nte ciámp desferenc:

Le tabele su le strade

Grazie a chël che l é scrit nte la Lege n. 482/99 l é sté poscibile cambié le tabele su le strade: l é sté arjont, da vejin ai inom dei luosc n talián, ence l inom n ladin. La colaborazion co le trei aministrazion de Comun nteresciade (Ampëz, Còl e Fodom) l'é stada tánt mportánte percieche la fat scì de fè jì nnavánt n laour che l Istitut s'ava tout a cuor.

Microtoponomastica

Ven metù ju n Atlánte Toponomastico dei Comuns de Ampëz, Còl e Fodom. Per chëst laour ven damanèi fòra i inom dei luosc n ladin a la jent, mascima ai vegli; chisc inom i ven metus via auna a foto dei trei teritori per pò ester scric ite nte de le chèrte. L laour l ven metù nten programa de computer grazie a na sòrt de strumenc GIS fac apòsta per chisc dati. Nfin ades l é sté ciapé zirca 4.000 inom de luosc dei trei Comuns e l laour l é mpèrmò scomencé...